【Emily】陳蕾張天賦任表演嘉賓 嶺大Sing Con會員限定

【明報專訊】歌手陳蕾及張天賦（MC）、樂隊KOLOR及The Hertz將於今個月18號去嶺南大學校園，為歌唱比賽（Singing Contest）做表演嘉賓，Emily都想去現場睇show，不過根據學生會嘅售票詳情，入場睇表演要先做嶺大學生會會員，每人限買一張飛，唔可以「代購」幫非會員買飛㗎。前學生會臨時行政委員會主席、歌唱比賽籌委會主席唐健樂同Emily講，成個活動開支30萬元，邀請呢幾個歌手及組合做嘉賓係因為多同學鍾意聽，原本仲邀請埋啱啱喺紅館開完個唱嘅林家謙，但比賽延遲至8月，對方因為有工作而嚟唔到。