【Emily】劏房戶為子置二手鋼琴 鄧炳強探訪讚得獎爭氣

【明報專訊】新一屆政府話要處理跨代貧窮問題，司局長不時落區探訪基層，保安局長鄧炳強噚日就去觀塘探劏房戶。安排官員探訪嘅觀塘區議會主席柯創盛（柯仔）話，其中一戶一家四口住劏房，大仔彈樂器有天分，雖然家境一般，但媽媽死慳死抵都要買一部二手鋼琴畀囝囝，鋼琴已佔斗室近半空間，而小朋友都好叻，喺校際比賽拎到冠軍。柯仔話，小朋友就讀嘅學校有支援教樂器，等佢可以喺屋企練習；又指呢個住戶已申請公屋幾年，最大願望係盡早上樓。