新歌MV吊威也3小時見暈 陳奕迅開騷有壓力 感激途人鼓勵

【明報專訊】陳奕迅（Eason）今日（9日）在紅館舉行25場跨年演唱會，今次他提早排舞，開騷前又閉關免生病。他說：「臨近演唱會少出街，見演唱會大家咁支持，啲飛賣得咁好，都有壓力。演唱會始終是一件好大的事，有時我都會驚一驚，驚自己唔知做得好唔好。但每當呢啲時刻，個天就會派人來鼓勵我，例如身邊朋友，或者在街上，總會有人同我打招呼，然後話『你啲飛好難買呀！加油！』真的好溫暖。多謝大家，咁多人惜我，我會加油做好每一場。」