Emily online｜江玉歡指拒撤「疫苗通」或會歧視未打齊針者　醫衛局：已取平衡 (17:44)

立法會議員江玉歡噚日係Facebook引述醫衞局副局長話，新一輪放寛措施係想讓「市民」回復正常活動，佢質疑政府點樣定義「市民」一詞，反問「未打齊針的市民不是香港市民嗎？」。她話所有措施都唔可以有歧視之嫌，否則有可能違反《基本法》39條，當中提到《公民權利和政治權利國際公約》等國際公約適用香港嘅規定繼續有效，佢睇返公約內容明確指出市民擁有基本工作同生活權利，質疑局方多番拒絕取消、放寛疫苗通行證，以對市民嘅定義均可能有違公約原則。

醫衛局回覆我哋話，政府推行「疫苗通行證」一直係防疫和巿民日常生活之間取平衡，巿民返工、返學、係指定醫療處所求診或接受治療都無受限，巿民獲取日常生活必需品嘅時候都可以有其他選擇。局方話疫苗接種係對抗新冠病毒其中一個最有效嘅方法，自政府推出「疫苗通行證」以嚟，已完成接種三針嘅接種率由二月底嘅大約23%，急速提升至而家嘅83%，呢個亦係支持政府可以逐步放寬唔同社交距離措施嘅原因之一。醫衛局話補充，而家「一老一幼」嘅接種率仍然未如理想，政府會繼續推動疫苗接種，務求令香港嘅防疫屏障更為穩固，更加能保護重點人群。