【Emily】城巴新巴合併 員工享一日「合併假」

【明報專訊】城巴及新巴7月合併，原有新巴路線將會併入由城巴經營，為咗處理合併後嘅員工安排，城巴、汽車交通運輸業總工會（城巴分會）、汽車交通運輸業總工會（新巴分會）共三方近日簽署咗協議，話新巴「固定字軌」（意思固定路線）車長嘅編更安排，將會由維持1年延長至3年，而所有合資格員工亦享有一日嘅「合併有薪假期」。

三方嘅協議喺勞工處、運輸署代表在場見證下簽署，城巴形容係多月以嚟同員工、工會及勞資協商會持續交流嘅成果。城巴話，未來會繼續同各方保持緊密合作，透過工作小組做研究同推出先導計劃，完善編更制度、駕駛室設計、制服、福利等，以平衡勞資權益同埋適應市場。城巴營運總裁李卓豪話「員工是公司最重要的資產」，相信今次簽訂嘅協議有助城巴實踐願景，亦係邁向專營權合併嘅「重要里程碑」。

相關字詞﹕兩巴合併 汽車交通運輸業總工會（新巴分會） 汽車交通運輸業總工會（城巴分會） 新巴城巴 城巴