【Emily】回顧抗疫 明德醫院話無拒收公院病人

【明報專訊】舊年新冠第五波疫情嘅時候，政府批評私家醫院幫手接收醫管局病人嘅力度唔理想。明德國際醫院醫療營運總經理張莉噚日出席傳媒午宴時話，收症初期嘅一啲小問題（hiccups）唔係單方面，受到病人轉院意願、聯絡家屬、醫管局人手調動、病人運輸等影響，相信經過今次經驗後，轉介機制已經非常穩固，日後一旦需要啟動就可以即刻收症。

明德國際醫院醫務行政總監張永基就話，醫院共有104張病牀，高峰期曾動用20%病牀接收醫管局港島西聯網轉介嘅病人，包括長期住院者，同埋骨科、內科、外科康復病人，全部都喺公立醫院做完手術先轉介。

Emily記得，政府舊年曾經話過有私家醫院周末唔肯收症，張永基就話佢哋醫院無拒收，但承認要視乎唔同時段人手，又話醫管局港島西聯網人員曾經去過佢哋度視察，了解適合接收邊類病人。

相關字詞﹕醫管局 明德國際醫院 私家醫院 新冠疫情