【Emily】薄鳧林牧場開幕 周五至日免費導賞

【明報專訊】原為一級歷史建築嘅舊牛奶公司高級職員宿舍，經香港明愛活化後成為薄鳧林牧場，噚日正式舉行開幕禮。牧場聽日起舉行開幕同樂日，並會舉辦展覽同工作坊等。牧場日後每逢周五、周六及周日會有免費導賞，帶參加者遊覽牧場，並介紹牧場嘅建築特色同舊牛奶公司嘅發展歷史。

介紹牛奶公司歷史 已接待3.2萬人

薄鳧林牧場督導委員會委員冼昭行話，牧場舊年已經開始試業，至今接待咗3.2萬人。佢又話，因應營運首年獲得發展局補貼約110萬元，舊年已經收支平衡，期待開幕後今年到訪人流可以升三成。佢同時指出，參觀者到場後可以了解到牛奶公司嘅歷史，例如員工制服同埋宿舍嘅由來等，佢期望計劃可以令參觀者一齊建構薄鳧林牧場，令呢片土地同社群再度連結，成為大家嘅家。

甯漢豪：檢視活化計劃可否鬆綁

發展局長甯漢豪就話，經活化嘅歷史建築猶如重生，注入新生命，好似呢個活化項目將附近薄扶林村同學校等歷史串連起嚟，而歷史背後亦有好多文化、宗教、教育等故事。佢又話正檢視緊「活化歷史建築伙伴計劃」有冇地方需要拆牆鬆綁，令有心嘅申請人唔會卻步。

相關字詞﹕薄鳧林牧場 舊牛奶公司高級職員宿舍