【Emily】徐英偉將任酒店業主聯會總幹事

【明報專訊】前民政事務局長徐英偉（Caspar）上年離開政府之後，有時會出席電視節目，同埋拍片介紹本地遊。Emily喺酒店業界人士度聽聞，Caspar即將加入酒店業主聯會擔任執行總幹事，接替上年11月過身嘅老行尊、1985年開始做總幹事嘅李漢城。Emily問咗Caspar，佢無確認亦無否認，只係話暫時無嘢講。至於係唔係下個月有新動向，佢就巧妙回應話「3月無新動向」。

Emily聽聞，酒店業主聯會已經完成遴選，Caspar最快下個月正式返工。Caspar係少數由政助、副局長再做到局長嘅人，由於離開政府超過一年，所以新工作喺技術上唔使申報。酒店業主聯會本身除咗係酒店業團體，選舉委員會中酒店界嘅16席，都係由業主聯會有表決權嘅成員選出。

相關字詞﹕酒店業主聯會 徐英偉