【Emily】新田科技城讓路 發展委會先傾棕地

【明報專訊】立法會發展事務委員會原訂下周二（25日）開會傾北部都會區旗艦創科項目「新田科技城」，但委員會本周一（17日）突然話應「政府當局要求」修訂咗議程，押後到下月23日嘅會議先傾新田科技城，改為新加入「向受政府項目影響的棕地作業提供協助」項目。Emily聽講，因為由特首主持嘅「北部都會區督導委員會」喺呢個月已傾過新田科技城嘅規劃，所以當局想再小心規劃先再上立法會討論，於是押後議程。

發展局話，原本打算喺下星期嘅會議匯報新田科技城嘅規劃進展，但睇過工作進度同埋經立法會主席同意後，計劃喺下月嘅會先匯報。局方話因北都同其他發展項目嘅全面推進，畀政府收番同清拆嘅棕地會增加好多，所以支援受影響嘅棕地作業者係重點工作之一。

發展局仲話，因應城規會上星期公布修訂有關「擬作露天貯物及港口後勤用途而按照《城市規劃條例》第16條提出的規劃申請」嘅規劃指引，想第一時間喺呢個月嘅會議向立法會同公眾交代有關修訂。