【Emily】睽違5年 勞力士帆船賽維港啟航

【明報專訊】新冠疫後體育活動漸復常，「2023勞力士中國海帆船賽」事隔5年後重臨香港，噚日由副財政司長黃偉綸主持啟航儀式。黃偉綸話，長途帆船賽中，船隊要互相比併航海技術、體力、耐力以至團隊合作、戰術運用等，佢祝願參賽者順利橫越充滿挑戰嘅南海，安全完成賽事。

帆船賽始於1962年，兩年一度，今年踏入61周年，屬亞洲最經典離岸賽事之一。參賽船隊喺維多利亞港起步，需橫越南海，以菲律賓蘇碧灣為目的地，整個賽程長達565海里。

另外，副政務司長卓永興前日就約埋路政署長陳派明，視察署方美化鑽石山龍蟠苑旁嘅行人隧道、香港仔中心旁嘅行人天橋升降機，以及中環山頂纜車總站旁嘅天橋墩等，睇吓路政署職員點樣花心思，喺石屎橋墩繪上色彩斑斕嘅圖案，突破沉悶，好似纜車總站旁嘅橋墩，就有紅嘴藍鵲、葵花鳳頭鸚鵡、松鼠、箭豬等嘅彩繪。

相關字詞﹕中國海帆船賽 卓永興 黃偉綸