【Emily】故宮館國寶「換畫」 睇慈安太后便服Look

【明報專訊】香港故宮文化博物館噚日宣布，今個月開始展出44件從故宮博物院借出嘅第四批新輪換展品，包括5件國家一級文物，大部分只可展出至今年6月。今次展出嘅涵蓋書畫、服飾、典藏等，其中25件會喺展廳2「紫禁一日──清代宮廷生活」展出，包括國家一級文物、由宮廷畫家徐揚繪製共16頁嘅《平定金川戰圖冊》其中5頁。

另一展品係喺展廳1「紫禁萬象──建築、典藏與文化傳承」展出嘅《璇闈日永圖軸》（慈安皇太后像），屬於慈安罕見嘅便服畫像，同慈安關係親近嘅同治帝更喺畫上御筆親賀「璇闈日永」，蓋上「同治」、「敬書」朱白文連珠印、「同治尊親之寶」朱文方印。此外，乾隆帝朝服像、月白色雲龍紋男夾朝袍亦會喺展廳1展出。

至於正喺展廳9展出嘅「金彰華彩──香港故宮文化博物館與夢蝶軒藏古代金器」，係首個以博物館館藏為主嘅特別展覽，亦係香港近年最大型金器展覽，展示220套跨越3000幾年歷史嘅古代中國金器，大部分展品係由夢蝶軒主人盧茵茵同朱偉基捐出，展期至今年9月25日。

相關字詞﹕香港故宮文化博物館