【Emily】「學生動力」調查 國土安全核心價值 100%受訪學生答啱

【明報專訊】政府前日（15日）舉行「全民國家安全教育日」，鋪天蓋地宣傳國安信息。立法會選委界別議員吳傑莊任主席嘅香港青年學生動力，搞咗個學生不記名國安知識調查，收集到408份問卷。調查問受訪者國土安全嘅核心價值係邊樣，結果100%答啱係領土完整、國家統一。不過，問卷問哪一個領域係國家安全嘅根本，準確答案係「政治安全」，但只有15%人答啱，大部分人以為係「社會安全」。

國安之根本唔係「社會安全」

吳傑莊話，喺10條問題中，有7條問題收集到嘅答覆屬及格及優良，反映國安教育有成效，但部分問題答錯比率較高，反映教育工作應更要深化細化，等大家能更熟悉《港區國安法》。

國安嘉年華 卓永興讚同學熟書

政府前日喺18區舉行唔同活動，唔少官員都走幾場。副政務司長卓永興噚日講番佢去咗警察學院開放日及大匯演，同觀塘區國家安全嘉年華。佢話嘉年華中有展覽環節，讚賞負責講解嘅3名同學好熟書，又話活動中嘅啦啦隊表演原來唔係一般嘅舞蹈表演，而係似體操嘅翻騰、飛躍表演，大讚表演精彩。

相關字詞﹕吳傑莊 國家安全教育日