【Emily】許正宇赴英金融論壇 示威者攔截房車

【明報專訊】財政事務及庫務局長許正宇正喺英國訪問，佢當地時間禮拜一朝早出席一個金融科技峰會時遇上示威，「香港監察」等團體抗議佢到訪。論壇後有一名揮舞「光時」旗嘅示威者嘗試攔截兩部黑色房車，《美國之音》報道，當時車上疑載有許正宇同其他香港官員。根據片段，該示威者一度嘗試攔截其中一架車，但遭另一男子推開，車輛才能駛走。Emily問過局方，局長當時喺唔喺車上，截稿前未獲回覆。

談虛擬資產 話囝囝學校玩NFT

許正宇出席政府投資推廣署有份支持嘅峰會時，推廣港府對虛擬資產發展同規管制度，政府亦歡迎全世界金融科技公司落戶香港。佢又話，今年11月初會繼續舉辦金融科技周，歡迎業界由英國來港睇吓。據報許正宇喺會上又話，自己其中一個仔已經喺學校同同學交易緊NFT（非同質化代幣），相信呢方面好大潛力。

許正宇又會見資產管理規模達1400億美元嘅投資公司英仕曼嘅首席執行官Luke Ellis，並重申香港兼具中國同全球雙重優勢。

相關字詞﹕許正宇