【Emily】周四日偏食 太空館網上直播

【明報專訊】本周四（20日）香港會睇到日偏食現象，太空館就有活動方便市民觀日。當日太空館將喺下晝12點30分至1點20分，透過YouTube頻道（www.youtube.com/hkspacem）及「康文＋＋＋」facebook專頁直播，而喺中午12點至下晝1點30分，尖沙嘴梳士巴利花園玻璃屋會設置太陽觀測工具，派發太陽濾光片，畀市民睇日食。

康文署話，今次日食最大食分介乎0.02至0.03，即在食甚時，太陽直徑嘅百分之二至百分之三會被月球遮擋。由於日偏食喺中午發生，全港大部分地方都可以睇，而於東南部地區嘅日食食分較大，日食時間較長，大家不妨考慮去九龍東或港島東等地區觀賞。

建議九龍東港島東觀賞

康文署提醒大家，觀測太陽時必須使用專門嘅濾光設備，唔好用肉眼或望遠鏡直接睇，其他不當方法包括使用煙熏鏡或太陽眼鏡，因都會對眼睛造成永久傷害。如錯過咗今次，下次喺香港出現日偏食會係2028年7月22日，而屆時食分比今次更小。

相關字詞﹕太空館 日食