【Emily】盧偉國訪華為小鎮 「同華為淵緣早於90年代」

【明報專訊】立法會議員大灣區考察團有唔少景點參觀，噚日部分人去咗科企華為喺東莞嘅「華為小鎮」，議員爭相「打卡」留影。工程界議員、經民聯盧偉國（圖）就話自己同華為都有淵緣，早於1990年代開始同華為有業務來往，當年與華為創始人任正非喺蛇口會面，話當年嘅華為，有用佢公司設計生產嘅電源模塊，以提升華為嘅程控交換機可靠度。盧偉國話當年，指華為從無到有，攀登一個又一個科技高峰，形容係中國人嘅驕傲。

有團員華陽湖濕地公園泛舟品蕉

松山湖溪流背坡村「華為小鎮」佔地廣闊，盧偉國話面積相等於6.5個維園大細，分成12個區域，每區模仿一個歐洲城市，令員工恍如置身歐洲小鎮，話環境咁靚，唔怪得華為嘅人咁有創意。

行程除咗睇企業，亦有參觀旅遊景點，部分團員去咗華陽湖國家濕地公園。議員江玉歡讚歎當地政府成功將一片污水地演變成保育項目，佢哋並泛舟河上，品嘗當地出名嘅香蕉。

一半議員參加咗佛山嘅行程，去咗嶺南天地等景點。議員梁美芬話，咁啱碰正係佛山每年盛大嘅廟會，佢哋晚上出咗去趁熱鬧，同何君堯、尚海龍及陳沛良等去食順德雙皮奶及預訂大良牛乳。