【Emily】團隊獲舞蹈年獎提名 李予信：重大嘅鼓勵

【明報專訊】東區區議會前區議員李予信雖然面對民主派初選案官非，但無阻佢投入街舞，仲愈來愈有進步。近日佢同團隊「迅捷靈魂」作品，更獲提名競逐香港舞蹈年獎中「傑出另類場地舞蹈製作」，為3個入圍候選作品之一。李予信喺facebook話，舞團一步步由街頭行到今日獲得舞蹈年獎提名，雖然最終未獲獎，都係一個意義重大嘅鼓勵。

李予信回憶話，舊年呢個時候因為種種限制，舞蹈界無辦法舉辦活動，但正正就喺最壓抑之際，佢同團隊開始原創實驗性街舞作品，展示所熱愛嘅街舞「Breaking」，之後仲有機會喺不同比賽同表演將作品帶畀觀眾同其他舞者。

佢最後話，相信呢一切只係起步，希望將來不斷有更大進步同創作，並不忘呼喊「香港舞者加油！」。