Emily Online｜劇評人獎 舞台劇《我們最快樂》獲3獎 (00:21)

「IATC（HK）劇評人獎」2022噚晚舉行頒獎禮，曾於香港藝術節演出嘅舞台劇《我們最快樂》，獲得3獎成為今屆大贏家，包括年度演出獎、年度導演獎、年度劇本/編劇獎；該劇導演黃龍斌同編劇莊梅岩過往都有作品入圍，今屆係首次獲獎。以同志為題材嘅《我們最快樂》原訂2020年上演，其後因新冠疫情而多次取消或延期，最終更要易角，喺去年11月先正式上演。

劇評人獎由國際演藝評論家協會（香港分會）喺2016年起主辦，每年喺香港公開演出嘅戲劇作品，不論首演或重演都係評選對象。今屆得獎名單中，同獲年度劇本/編劇獎嘅仲有胡境陽，佢憑前進進戲劇工作坊嘅《案內人Hongkongshima》第二度獲獎。

有3名演員獲得年度演員獎，分別係藝君子劇團《辱兒樂園》（記錄版）嘅余翰廷、役者和戲《高野山の彼女》嘅林沛濂，同埋前進進戲劇工作坊×法國埃梅劇團《被縛的普羅米修斯》嘅陳秄沁；年度舞台科藝/美術獎就由自由空間嘅「表演未來系列」《白日》獲得。