【Emily】工聯會啟75周年慶祝活動 未提遊行

【明報專訊】工聯會噚日舉辦「慶祝工聯會成立75周年暨服務市民走在前」系列行動啟動禮。好多人關注工聯會今年會唔會「復常」，喺「五一」舉辦勞動節大遊行，會長吳秋北噚日再被追問時都係未有答案，佢話表達意見同訴求有各種各樣嘅模式，會再衡量邊種模式最有效，唔會放棄任何可能，又話五一係打工仔嘅節日，工聯會將舉辦各類活動，今年會有啲表達同倡議，亦會有記者會同慶祝活動，但就無提到遊行集會。

多個中聯辦同港府官員都有出席慶祝活動，特首李家超視像致辭時讚工聯會全力推動一國兩制，係愛國者治港嘅堅實力量，同時感謝廣大勞工為香港經濟同社會發展努力貢獻。

同樣以視像致辭嘅中聯辦主任鄭雁雄就話，75年來工聯會始終高舉愛國愛港旗幟，係香港繁榮穩定嘅中堅力量。