Emily Online｜政府足球隊周六對戰立會　卓永興負傷黃偉綸做代隊長 (15:29)

政府足球隊將會喺下月6號，同立法會足球隊喺小西灣運動場踢友誼波。財政司副司長黃偉綸今日（30日）喺facebook話，政府足球隊噚晚（29日）進行第三次練習，球隊喺先落後一球嘅情況下成功追平比數，同友隊1:1打成平手。

黃偉綸話會保持住比賽狀態，約定立法會足球隊成員本周六（6日）見，噚晚同場仲有律政司副司長張國鈞、運輸及物流局長林世雄、行政長官辦公室傳訊秘書謝振中。而作為政府足球隊隊長嘅政務司副司長卓永興，因為喺今個月中練習時拉斷右腳跟腱，要接受手術，未知可唔可以落場踢，暫時由黃偉綸做代隊長。