【Emily】將與立會鬥波 政府隊高官雲集

【明報專訊】政府足球隊將於5月6號（周六），同立法會足球隊喺小西灣運動場踢友誼波，但隊長、副政務司長卓永興上月中練習時拉斷右腳跟腱，要接受手術，隊長一職就由副財政司長黃偉綸頂上。政府足球隊前晚（4月29日）有第三次練習及友賽，睇番出場陣容，都有唔少問責官員及高級公務員撐場，包括副律政司長張國鈞，運輸及物流局長林世雄就負責守龍。

卓永興受傷 黃偉綸做隊長

政府足球隊揀咗件紅色波衫做隊衣，印有區徽標誌。隊中有3名龍門，而林世雄件波衫好搶眼，橙色長袖，胸口位印有「七龍」二字，另外兩個龍門係副勞工處長馮浩賢及效率專員李國彬。球員來自唔同部門，包括警察背景嘅行政長官辦公室傳訊秘書謝振中、副運輸及物流局長廖振新，以及公務員事務局常任秘書長梁卓文等。

黃偉綸喺facebook話，球隊前晚喺先落後一球嘅情况下追平比數，同友隊1:1打和，又話會保持住比賽狀態，周六同立法會隊一戰。選委界別議員林筱魯就留言「嘩，好驚啊」，看來戰意味濃。