【Emily】一注中逾500萬 領獎不用再登記

【明報專訊】馬會每年都會「製造」好多個百萬富翁，但每年亦有唔少「大頭蝦」幸運兒中咗巨獎後，唔記得喺指定時間內登記同領獎。馬會噚日就公布，今日（2日）起取消10元一注中超過500萬元彩金嘅中獎登記安排。

根據馬會公布，若每10元一注獲中彩金超過500萬元，所有中獎彩票持票人或者經電話投注服務（包括1886電話投注自動服務系統）、智財卡同「固定指示」服務投注嘅中獎者，唔使再向馬會登記。至於使用數碼平台，包括網上投注服務「投注區」www.hkjcracing.com、馬會投注三合一、Racing Touch同GoalX嘅App等等，又或者馬會電子錢包中獎者毋須登記嘅安排，就會繼續維持。

馬會話，所有經投注戶口投注嘅中獎者彩金，會喺確認派彩後，自動存入其投注戶口。不過，如果係用現金投注，彩金金額係100萬元以上，就要去馬會總部大樓以支票方式領獎喇。