【明報專訊】政府提出收回粉嶺高球場部分土地作發展用途，香港哥爾夫球會近期頻頻開放球場供公眾參觀，力銷球場價值。噚日五一假期，「粉嶺舊球場」有一項單車定向同樂日活動，係球會成立超過130年來，首次贊助場地舉辦單車定向活動，吸引逾1000人參加。
香港哥爾夫球會會長郭永亮致辭時話，粉嶺舊球場係香港高爾夫球運動嘅搖籃，係香港少有融合歷史生態價值嘅地方。今次活動仲有立法會議員劉國勳（新界北）、李梓敬（新界東北）及何敬康（選委界別）等政界人物出席。李梓敬話，隨住高球逐漸普及，粉嶺舊球場作為全港唯一一個國際級賽事場地，「十分值得保留」。劉國勳話，期望球會可舉辦更多活動畀公眾及北區市民參加。
