【Emily】東主涉元朗命案 「嘉麗園」麵店拉閘

【明報專訊】元朗康樂路3月底發生命案，70歲男子陳廣權被斬死，警方經調查後拉咗8個人，包括死者所住大廈地下粉麵店「嘉麗園」嘅老闆許光耀。近日傳出「嘉麗園」結業，飲食資訊平台OpenRice亦已更新餐廳狀况，顯示「已結業」。

Emily噚日入去睇過，見到「嘉麗園」拉咗捲閘。有內地旅客專登去幫襯，結果「摸門釘」。死者曾經係所住大廈利景樓業主立案法團委員；法團主席盛先生之前話過，嘉麗園每日凌晨用機器打牛丸，噪音滋擾居民多年，佢噚日就話：「?家舒服晒啦，居民就有覺好瞓，事情亦得到解決。」

「嘉麗園」老闆許光耀同另外3名被告上月底被押往屯門裁判法院提堂，其中許同林智曜同被控一項謀殺罪，林同另外兩被告被控一項串謀妨礙司法公正罪，案件押後至7月5日再訊，待警方進一步調查，許、林須還押。