【Emily】青年調查：八成人最想政府免息貸款助置業

【明報專訊】香港後生仔上樓難，關注青年住屋聯席喺上月3至28號，透過facebook問卷訪問400個18至48歲市民，發現55%受訪者冇聽過政府《青年發展藍圖》嘅住屋政策內容，88.5%話自己唔打算申請青年宿舍。調查歸納咗受訪者意見話，希望青年宿舍年齡資格調高到35歲，同埋提高入息同資產限額。

79%撐隔離設施轉青年宿舍

80.2%受訪者支持政府改裝酒店或賓館，額外提供3000個青年宿舍宿位，亦有79%認為政府應該將社區隔離設施轉為青年宿舍。聯席擔心同內地通關之後，會影響政府將酒店或賓館轉為青年宿舍嘅計劃，建議政府將隔離設施轉做青年宿舍。

另外，調查發現受訪者對買樓置業嘅期望平均有8分（10分滿分），不過對於能夠成功置業嘅信心就平均得4分，近八成受訪者最想政府「提供免息貸款計劃」，亦有45.5%預計要花10年以上儲首期。

聯席促請政府研究推出「首置免息貸款」先導計劃，制定適量名額協助首置者圓置業夢。