【Emily】五四104周年 陳國基話聯想到「完善地區治理」

【明報專訊】噚日係五四運動104周年，唔少愛國組織同學校都舉辦活動，包括升旗禮及步操活動等。五四運動高舉「德先生」（民主）」和「賽先生」（科學）兩大旗幟，係中國當代青年啟蒙運動。社會對民主嘅定義唔同，例如周二政府提出區議會改制，削減直選議席至兩成，被問及咁係咪民主倒退，特首李家超當時解釋，完善地區行政唔應該單單睇某一種議員所佔比例咁簡單。政務司長陳國基噚日出席五四活動時都有借題發揮談民主，又談區會改制嘅好處。

19隊青少年制服團金紫荊升旗

陳國基話五四運動所表現嘅係「愛國、進步、民主、科學」精神，激勵一代又一代人自強不息推動社會向前同國家發展。佢提及五四令佢聯想到政府提出「完善地區治理」方案，就係要喺維護國家安全嘅大前提下重塑區議會組成，引入「三會」委員提名安排以至資格審查機制等，就係要確保所有候選人、當選人都愛國愛港。

香港各界青少年活動委員會籌辦嘅「香港五四青年節2023金紫荊廣場五四升旗禮」噚日喺灣仔金紫荊廣場舉行，除咗有19隊青少年制服團隊參加升旗，仲包括制服團體聯同香港青年協會代表宣讀「五四宣言」及頒發「五四旗手」榮譽儀式。