【Emily】社企推智能漂書機 黃錦星捐書話當年

【明報專訊】由一班年輕人成立嘅社企「一沓紙」首創智能漂書機，結合埋手機應用程式，將傳統漂書過程數碼化，市民可以先喺網上揀喜愛嘅書，然後去各區都有嘅漂書機攞書，仲可以即刻捐埋書。「一沓紙」噚日喺中環街市舉辦活動介紹呢部漂書機，卸任後仍然心繫環保嘅前環境局長黃錦星（圖）都有出席，仲「漂」出4本書。

噚日係五四青年節，黃錦星喺facebook提到捐出嘅4本書代表佢青年至今嘅歲月，包括由著名建築學家梁思成遺孀林洙撰寫嘅《梁思成、林徽因與我》，佢提到梁思成父親梁啟超同五四運動嘅歷史環環相扣。佢又話大學修讀建築設計，跟教授投入本地同內地田野考察，鍾情傳統民居建築，梁思成同林徽因嘅故事成為佢嘅閱讀對象。

身兼碳中和及可持續發展委員會主席嘅行會成員林正財亦到場，仲喺facebook大讚社企發展智能漂書機，除咗可以畀書籍第二生命，更加做到以書會友同連繫社區，仲可以減碳，形容十分厲害。