【Emily】孫玉菡上內地招聘網直播搶人才

【明報專訊】政府話要搶人才，訪京嘅勞福局長孫玉菡除咗獲港澳辦主任夏寶龍接見，仲獻出咗「第一次」，喺內地私人企業招聘平台做直播對談，為搶人才可謂出盡法寶。直播以「想要去香港工作的你，這場直播一定別錯過！」作招徠，有超過6500人睇。直播期間孫玉菡話，香港係國際化定位最高嘅城市，作為據點連接國際同內地城市，認為同深圳及上海等內地城市定位唔同。

孫噚日出席嘅係內地人才線上服務平台「獵聘」主持嘅直播對談。當主持人提到全中國都搶緊人才，孫就話覺得香港係國際化城市，由香港去大部分內地城市只需飛4個鐘頭就到，同深圳、上海等城市喺搶人才方面競爭關係唔大。他又話高才通計劃每日平均收到約200宗申請，情况理想，建議有志來港嘅人才可以先搵定工，利用香港一國兩制嘅優勢，發揮所能。

Emily見局長去直播間同主持會談咁新穎，就向勞福局查詢，獲回應話今次係孫局長首次出席內地私人企業平台推廣香港招攬人才政策，日後亦會利用唔同平台及場合解釋、推廣政策。