【Emily】民建聯倡東九捷運「混合模式」發展

【明報專訊】民建聯連月嚟多次建議喺東九龍採用內地「雲巴」，民記噚日話，上個月去咗內地考察唔同方案，又有啲新諗法，最新建議東九龍嘅高架無軌捷運系統應該用「混合模式」發展，即係各地區按人口密度、需求同地形等，各自選擇唔同嘅捷運系統，例如人口密集商業區用單卡載客量較高嘅「智軌」，人口較少嘅半山地區先用「雲巴」或者BRT。 民記仲話應該趁機利用埋條高架橋，興建空中單車徑同行人步道，舉辦跑步同單車等體育盛事。

據民記考察所得資料，湖南株洲智軌（ART）兩卡可載197人，五卡載527人；深圳坪山雲巴最多載560人，但就要八卡車先載到，四卡就載280人。至於廈門快速公交（BRT）就一卡載80人、兩卡載130人。雲巴同ART都係無人駕駛，BRT就要車長駕駛。

至於空中跑步同踩單車嘅提議，民記話廈門BRT系統加咗單車徑後成為當地新景點，吸引咗大量遊客；而重慶嘅雲巴系統就同時加咗步道同單車徑，覺得香港可以參考吓。