【Emily】歐洲日酒會 李家超出席致辭

【明報專訊】特首李家超同一眾歐盟領事噚日雲集歐盟駐港澳辦事處舉辦嘅歐洲日酒會，慶祝歐盟成立。歐盟駐港澳辦事處主任高宇馳致辭時，除提及歐洲企業係香港最大外資，仲重申香港維持繁榮穩定、尊重法治、民主程序同對國際承諾，都符合歐盟利益。佢話過去歐盟關注香港政制法治，一直出於香港同港人最佳利益，重申完全支持一國兩制。

民主派獲邀 罕有與官員同場

特首李家超就趁機推銷香港，話香港「騷亂同暴力已成過去，街道變得安全」，又話「東方之珠」已經重回經濟發展同長期繁榮穩定嘅路上。由於酒會喺中環海事博物館舉行，李家超特別提及海事佔香港經濟生產總值超過4%，而國際航運組織今年會喺香港舉辦周年大會，相信歐盟可以喺香港海事競爭力上扮演角色。法國總統馬克龍早排訪華，李家超致辭時就提及法國，話法國藝術節近期舉行，香港有中國同全球雙重優勢，捨我其誰？

Emily留意到，除咗政商界，歐盟都邀請到個別已轉趨低調嘅民主派人士出席，同政府官員同場，都算罕有。