【Emily】拍片介紹工作 陸頌雄扮保安

【明報專訊】工聯會噚日喺佢哋嘅YouTube頻道上載影片，透過短劇同訪談向年輕人介紹保安員工作，立法會議員陸頌雄仲粉墨登場，喺短劇扮演應徵做「超級保安」，戴上VR（虛擬實景）眼鏡進入虛擬世界，應對3個難關，包括要求心急上樓嘅外賣員事先登記、通宵值班、巡樓，其間佢扮鬼扮馬，用幽默方式表達保安員日常工作嘅挑戰。

工聯會屯門地區辦事處社區主任陳文偉就飾演唔想登記就上樓嘅外賣員，佢話「我就快遲啦！」陸頌雄阻住唔畀佢上樓，堅持要佢登記，兩個人來來往往拗咗幾句，交足戲之餘，亦好反映現實。陸頌雄之後再扮通宵值班捱眼瞓，表演用膠紙貼眼皮，仲用原子筆扮「刀仔拮大髀」頂眼瞓，表情十足！最後佢巡樓時，仲要畀喺後樓梯食薯條、滿口茄汁嘅居民嚇親呢！