【Emily】減國安威脅 林新強以曼聯後衛「麥麥送」比喻

【明報專訊】立法會噚日討論修訂《法律執業者條例》，法律界議員林新強發言時再次促請當局「一刀切」禁止海外律師參與國安案件，杜絕國安威脅，仲引用英超球隊曼聯後衛麥佳亞做例子，「英國曼聯足球隊都有個後衛叫『麥麥送』，無人能夠擔保做防守或死守唔會出錯」。

林新強認為，今次修例只係將守門員角色由法官變成特首，再額外加上律政司擔任後衛。佢話，特首同律政司當然都係愛國愛港，但無人擔保防守唔會出錯，仲以被諷刺為「麥麥送」嘅曼聯後衛麥佳亞做例子。

林指出，修例未必能鎖上「無掩雞籠」，憂慮部分人仍然可以「偷雞」，包括不斷申請聘用「反中亂港」嘅海外大律師再挑起不滿，猶如煽動球迷向守門員同後衛掟樽、衝入球場引起混亂。