【Emily】葛珮帆伙藝人開記招 促停用老鼠膠板 環境局：一街市膠板月捕469隻 他策最多三數十

【明報專訊】政府近年大力滅鼠，平時唔少人都會用老鼠藥、老鼠膠板等工具滅鼠，政府都唔例外。立法會議員葛珮帆噚日聯同一班動保組織人士、藝人包括郭秀雲、陳庭欣等召開記者會，話用老鼠膠板滅鼠極不人道，十分殘忍。葛珮帆話，被黏住嘅動物通常會經歷幾個鐘甚至幾日嘅痛苦，先會死於飢餓或失血過多，而且有啲動物為求脫身，會撕破皮膚，或者咬斷被黏住嘅部位，令動物遭受不必要嘅痛苦。

環境及生態局回覆查詢時話，食環署喺黃大仙大成街街市比較各種捕鼠方法效果，2022年上半年以傳統老鼠籠方式，平均每個月只係活捉到4.5隻，去年8月起實行深宵密集式滅鼠行動，平均每月只活捉到十幾隻，自10月起試用酒精捕鼠器，平均每月30幾隻；11月起用老鼠膠板後，一個月內就捕獲469隻。

不擬棄用 當局稱盡快人道處理

當局話，老鼠繁殖能力強，為有效保障市民健康，恰當運用老鼠膠板係重要嘅滅鼠工具，而政府都冇計劃禁止使用，但已訂立嚴格指引，若發現老鼠膠板捕獲老鼠，會盡快以人道方式處理。