【Emily】港大香港研究十年慶 Serrini返母校講talk

【明報專訊】今年係香港大學香港研究課程創辦10周年，下周一（15日）下晝舉辦慶祝活動，邀請咗博士畢業生、獨立唱作歌手Serrini（梁嘉茵）出席講座，除咗分享研究香港文化生活同創作嘅心路歷程，仲會大展歌喉。

睇番活動嘅海報，講座名為「十年樹木 此刻真美：梁嘉茵博士分享會」。海報形容Serrini喺創作過程以香港文化嘅詞韻精髓融入音樂創作，以音樂同藝術作品呈現呢座城市入面嘅人情百態，以獨有感性勾勒出香港文化面貌，又話希望透過對談，啟發參加者對香港文化產生新視野，「從一方阡陌裡的小情小愛窺見香港、文化、自身甚或世界的真與美」。今次講座由香港大學香港研究課程教授及總監朱耀偉主持，昨晚所見網上報名已額滿。