【Emily】社署「1+1」招募寄養家庭 家長可與親友拍住上照顧

【明報專訊】一齣《流水落花》令戲迷感受到寄養家庭嘅付出同意義，社署噚日舉辦「全城參與寄養服務」活動，署長李佩詩致辭時話，未能得到屋企人適切照顧嘅小朋友，可以喺寄養家庭嘅關懷下健康成長，希望活動令市民了解寄養服務嘅意義，認識寄養家長嘅辛勞付出。佢話任何人只要健康良好、有能力照顧小朋友，願意付出時間同提供安全環境，都可成為寄養家長，呼籲市民投入寄養服務。

「全城參與寄養服務」活動由社署舉辦、11間營辦寄養服務機構協辦，透過攤位遊戲同專題展覽，向市民介紹寄養服務資訊，分享寄養家長心聲。?家有約880個小朋友正接受寄養服務，社署近日推出「1+1」組合形式招募寄養家庭，等寄養家長可以同親友一齊參與照顧，互相支持。

家庭議會就趁噚日「國際家庭日」搞免費乘電車日，估計約20萬人次受惠，副民青局長梁宏正同家庭議會主席彭韻僖喺西區屈地街電車廠主持揭幕儀式，3架「畢得鳥家庭」主題電車未來4個星期繼續穿梭港島，傳遞「家．信守一生」信息。