【Emily】AI修復70年舊相 中環街市魚檔活化升呢

【明報專訊】三級歷史建築中環街市經活化後，今年踏入開放兩周年。負責復修活化嘅市建局，還原同保留咗街市一個魚檔作展覽用途，仲邀請著名視覺及數碼藝術家黃宏達，用創新AI（人工智能）修復一張攝於1950年代（即約六七十年前）嘅魚販喺攤檔販賣情景嘅相片，作為活化保育魚檔藍本，並為下一階段加設多媒體互動裝置做好準備，預期8月啟用，到時市民會好似置身舊時中環街市嘅攤檔現場，感受當中氣氛及可以「打卡」留念。

市建局話當初接收中環街市時，大樓嘅混凝土結構受鋼筋鏽蝕，損毁嚴重，攤檔組件亦殘缺失修，大部分檔口都唔可以完整保存。局方為還原檔口本來面貌，翻查咗大量文獻紀錄同歷史圖片，了解檔口運作。

局方話礙於昔日攝影技術所限，早期照片只限於黑白，而且大多模糊、曝光不良或有其他瑕疵，令人難以睇清楚細節。為咗畀市民體會昔日中環街市嘅氛圍，市建局特意保留一個售賣鮮魚嘅檔口作展覽用途，並透過AI科技修復相片，還原攤檔細節。

黃宏達話，修復過程花咗個幾月，選擇鮮魚檔嘅相係因為相對其他檔口更有層次同立體感。佢話，由於魚係「軟嘅東西」，點樣呈現到魚「仲係新鮮」嘅場景，都係修復相片嘅一大挑戰。