【Emily】AI偵測遇溺隔10月仍未測試 田二少：係咪耍議員？

【明報專訊】泳季又到，但好多泳灘及泳池設施因為唔夠救生員而開唔到。實政圓桌立法會議員田北辰去年7月已向文體旅局提問，要求引入人工智能偵測系統，偵測泳客遇溺，當時政府答覆喺「稍後」將於一個公眾泳池安裝及測試。事隔10個月，噚日立法會公務員及資助機構員工事務委員會會議再討論呢件事時，官員話正於觀塘泳池安裝系統，預料一兩個月後可測試。田二少對此好嬲，話政府仲同人講「提速、提效」，但去年話做測試，原來仲未開始，質疑政府係咪耍議員。

去年中政府答「稍後」安裝測試

康文署長劉明光噚日喺立法會回應話，一兩個月後先喺觀塘泳池試用防遇溺偵測系統，希望於今個泳季睇成效，明年再喺另一泳池試用另一款偵測系統，當收集完數據，再決定用唔用、用邊款系統。劉又話?家仍招聘救生員，估計遲啲可以開多啲泳灘，但要做到全面開放，今年就難成事。

田二少質疑署方搞咗咁耐仲未開工，更質疑點解唔可以慳時間，幾款系統一齊試，劉明光就話研究過裝某啲偵測系統，可能要喺泳池加建樁柱，有可能影響防水層，所以要時間研究。