【Emily】「任何仁」教議員做CPR用AED

【明報專訊】消防處長楊恩健噚日帶隊去立法會，向議員同秘書處職員講解自動心臟除顫器（AED）嘅用法，同埋點樣做心肺復蘇法（CPR），消防處仲出動埋「任何仁」親身示範，立法會主席梁君彥、選委界馬逢國、金融界陳振英、法律界林新強等十幾個議員都有出席，一齊學習兼練習做心外壓，同點樣用AED救人。

早前立法會秘書處增加咗16部AED，加埋原本嘅9部，總數增至25部，放喺大樓當眼處同埋公眾去到嘅地方，包括「鼓底」公眾入口。梁君彥期望立法會可以起帶頭作用，鼓勵更多機構安裝AED，又希望透過工作坊令議員裝備自己。

參與活動嘅自由黨主席邵家輝引述消防處話，香港每年有逾6000宗心臟驟停，隨時隨地都可能發生，如果可以喺3分鐘內用AED救人，患者存活率可超過七成，但存活率每分鐘就下降7%至10%，所以一旦延遲拯救，患者隨時無命，而香港心臟驟停患者嘅存活率只有2.3%，所以社會上愈多人識用AED同CPR，就愈多人喺緊急情况下幫到手。