【Emily】「430記招團隊」獲醫局嘉獎 疫情考驗執生 即場致電核實數據

【明報專訊】回望過去3年新冠疫情，除咗口罩、快測棒等醫療物資外，幾乎每日下晝4點半舉行嘅疫情記者會都令Emily印象深刻。醫管局噚日頒發傑出員工及團隊獎，其中醫管局總辦事處嘅「新冠疫情430新聞簡報會團隊」就獲得呢個殊榮。

得獎名單包括莊慧敏

醫管局同衛生署由2020年1月26號舉辦首個「430記者會」，至2022年9月24號完成最後一場「日日430」後，隨後改為每周一次。而要辦430記者會絕對唔簡單，團隊除咗有喺鏡頭面前侃侃而談嘅幾名發言人外，仲有機構傳訊部、總部重大事故控制中心等同事整合最新應變措施、收集並分析數據，簡直係「最強後盾」。Emily發現，得獎名單除咗醫管局總行政經理李立業、劉家獻、庾慧玲、何婉霞同關慧敏，仲包括早前盜竊罪成嘅莊慧敏。

團隊形容，疫情記者會係醫管局同公眾嘅溝通平台，市民可以從中知道公院最新安排，但疫情瞬息萬變，加上準備時間倉卒，憶述當時好考驗團隊臨場反應，例如試過因為數據太多，發言人喺記者會開始前都未有數據，只可以靠現場同事打番公司核實數據，再將正確資料傳畀坐喺台上嘅發言人。