【Emily】為與阿仔更好溝通 Miss Mo獄中再習法文

【明報專訊】民主派初選案被告之一、前議員毛孟靜（Miss Mo）仍然還押，其立法會前同事邵家臻及梁耀忠噚日去探佢。阿臻話Miss Mo還押兩年期間努力學習，因為佢其中一個仔長期喺法國生活，所以曾習法文嘅Miss Mo要急起直追學法文，希望能夠更順暢同阿仔以法文溝通，「上晝學法文，下晝學英文，晚上學中文」，Miss Mo仲苦笑話還押期係「前所未有地咁夠瞓，前所未有地睇咁多書」。

阿臻話，Miss Mo還押以來首次見到阿忠，表現興奮。Miss Mo提起舊事，話好欣賞梁耀忠當年為一眾「等候董建華發落」嘅少年犯爭取權利，更一字一句記得當年嘅報道內容，仲問阿忠案中主角近况點樣。

Miss Mo睇嚟精神唔錯，阿臻話佢之前患上流感，雖然已經康復，但睇落瘦咗少少。

阿臻又話，Miss Mo喺獄中「大棚」生活，跟30人一齊工作，與10人同一倉瞓覺，話群體生活令佢認識到世界嘅另一面，聽到好多唔同嘅故事，好似昔日做前線記者嘅日子咁，接觸到唔同嘅人和事。