【Emily】議員郭玲麗回應質疑：確診後有着秘書處消毒

【明報專訊】最近新冠疫情確診數字上升，立法會都先後再有議員「中招」，商台節目主持郭志仁噚日喺facebook不點名話，有一名女議員上周五通知大家確診，其議辦好多職員都同樣受感染，而同佢共用中信大廈同一層辦公室嘅議員，都同意立法會秘書處做吓清潔，事關同層仲有另一議員大肚，但指確診議員就好霸氣話「唔覺得有需要」，事後亦表示自己3日就康復。

商台主持不點名 「確診者稱不覺需要」

帖文一出，好多人都估到「女議員」就係民建聯郭玲麗，而郭玲麗噚日都喺facebook澄清，話上周四下晝由內地返港後開始不適，所以當日外交部駐港特派員劉光源去立法會，自己都戴口罩，翌日凌晨做快測，結果陽性，早上交代完工作，就安排秘書處消毒，又話辦事處有一名同事確診，其他同事仍「堅守一線」。

郭玲麗仲上載咗上周五（12日）至本周一（15日）嘅快測結果，由上周五凌晨兩點嘅「兩線」到周一朝早變成「一線」。睇番劉光源去立法會同議員嘅大合照，戴住口罩嘅郭玲麗就企喺角落頭，同身邊嘅張欣宇、林振昇都隔有一個身位。