【Emily】首建8層高過渡屋 彩虹「樂屋」供331伙

【明報專訊】九龍樂善堂營運嘅過渡房屋「彩虹彩興路樂屋項目」噚日舉行動土禮，項目將係全港首個樓高8層嘅過渡房屋，提供逾300伙，預計明年首季竣工。

「樂屋」係樂善堂5年內第12個啟動嘅過渡房屋項目，提供331個單位，供2至5人家庭居住。單位設客飯廳、寢區、煮食空間連廚櫃、獨立廁所連淋浴間，人均居住面積唔少於70平方呎，比好多「蝸居」港人嘅居住環境大。

九龍樂善堂主席李聖根話，團隊將原本喺土瓜灣宋皇臺道嘅108個組合屋搬去彩興路，再拼上223個全新組合屋，興建高8層嘅「樂屋」，完全符合創新環保原則。民建聯九龍東議員顏汶羽話支持政府善用土地，認為過渡房屋不但縮短公屋輪候時間，亦可改善有需要市民嘅居住環境。