【Emily】致辭「性感」聲沙 盧寵茂利申冇中招

【明報專訊】近日Emily身邊好多朋友感染新冠病毒，醫衛局長盧寵茂噚日朝早出席「亞洲醫療健康高峰論壇」致辭時聲沙沙，佢主動提起過去兩日公務繁忙，可能係過度使用甚或用錯聲帶，搞到把聲「好性感同少少溫柔」，仲要搵言語治療師改善發聲，不過佢強調自己無發燒、無咳嗽、無喉嚨痛。佢之後趕下場去立法會回應質詢都有「利申」，話自己新冠快測陰性。

Emily向佢嘅新聞秘書查詢，對方話盧寵茂近兩日真係好多嘢做，不過呢個星期會繼續返辦公室工作，亦會繼續同訪港衛生官員會面。睇番盧局長最近公開行程，佢本周先後同國家、廣東省、深圳市、北京市、天津市同上海市衛健委代表會面，禮拜一仲出席香港吸煙與健康委員會分享會，禮拜二出席醫管局研討大會，噚日朝早去完高峰論壇再去立法會。