【Emily】友師計劃完結後設校友會 助高中就學

【明報專訊】政府推出咗「共創明『Teen』計劃」，為基層初中生配對友師。經民聯選委界別議員陸瀚民噚日喺立法會話，計劃只為期一年，不足以解決跨代貧窮問題。勞工及福利局長孫玉菡就話，政府會喺計劃完結後成立一個「校友會」，繼續聯繫呢班學生，為學員喺高中期間提供就學等幫助。

為期一年 議員指難解決跨代貧窮

孫玉菡話，學員名額由最初2000名增加至2800名，較原定目標超出四成，並且獲得約120個企業和機構支持，又籌到約1.4億元捐款，招募到足夠人數嘅友師，以及約800節團體活動供學員報名參加。不過，截至2月底，一共有16名友師（即0.57%）及21名學員（即0.75%）退出計劃。

按照計劃，完成首階段迎新活動和3節基礎訓練課程（包括人生規劃、提升能力及財務計劃）嘅學生，可以先獲發啓動資金5000元，而至1月底，超過2000名學生已收到錢。學員完成整項計劃後，將另獲發5000元獎學金，由學員自行決定用途。