【Emily】跳出框框科藝結合 科學館辦材料展

【明報專訊】香港科學館今日開始至10月18日舉辦「天生我『材』——材料科學與設計」展覽，係首次同倫敦設計博物館合作，將對方嘅巡迴展覽帶嚟香港。展覽分4個展區，主角係為人熟悉嘅材料，包括木、金屬、陶瓷、玻璃、塑膠，會透過實物、圖片、錄像、藝術作品，帶參觀者認識材料嘅起源，點樣演變成生活用品，演變過程中帶來嘅影響，同埋研發新材料。

科學館館長劉啟業話見到近年有唔少藝術同科技結合嘅展覽，希望科學館嘅展覽唔好剩係純科學，今次唔止有來自英國嘅展品，仲結合咗香港本地元素，喺科學同藝術方面達至平衡。咁多個展區，佢話最鐘意係「演進」展區，例如會講解用香蕉皮做麻布、用香口膠做滑板轆，佢形容依類設計係跳出框框，好有趣。

展覽有唔少互動設施，例如會放置多種材料，參觀者可以摸下，又或者係感受下畀材料包圍。 行勻個展覽，Emily發現有唔少竹枝，劉啟業話竹喺香港好常見嘅建築材料，而且係可持續性材料，所以有呢個構思，成個展館用嘅竹加埋成1750米長，事前要蒸、焗同加塗層，避免有蟲同發霉。