【Emily】陳祖恒中山裝開會 李家超大讚「帥哥」

【明報專訊】立法會噚日舉行首場「特首互動交流答問會」，經民聯嘅紡織及製衣界議員陳祖恒（Sunny，圖）身穿一套由本地設計師設計嘅中山裝開會，佢話唔少香港設計師進軍大灣區面對挑戰，希望政府支援。特首李家超回應時大讚Sunny係「帥哥」、「高䠷身型與設計相得益彰」，仲話如果官員都著本地服裝，有助推動時裝設計。

李：官員都著本地服裝可助推廣

Sunny發言時先介紹一身中式禮服，話由本地設計師設計、覺得好靚，問李家超「唔知特首點睇」。李先讚Sunny著上「咁帥哥嘅服飾」，仲講笑話如果要官員穿上本地時裝，「要搵一個好似陳祖恒議員咁高䠷身型、模特兒身型，我相信就得（財政司）副司長黃偉綸先生，可能佢著得好睇啲」，引來哄堂大笑。Sunny期望政府善用「灣區標準」、簡化貨物進出口等，協助商界喺大灣區發展。

答問會上亦出現蝦碌場面，其中經民聯林健鋒發言時欲引述金融界陳振英，一時口快講咗「梁振英議員」，不過佢未有為意，要主席梁君彥出言糾正。