【Emily】庫存剩4日 紅會籲捐血 提大家新冠康復兩周後可捐

【明報專訊】近日好多人感染新冠同流感，少咗人捐血，公立醫院亦因服務需求殷切，對血液需求亦不斷上升。香港紅十字會輸血服務中心噚日話，血庫只係剩番4日存量，其中O型、A型同B型血尤其唔夠，形容每日收集血液數量同目標有「好大距離」，呼籲市民盡快捐血，話周末、下周佛誕假期（26日）都會開放捐血站。Emily聽到消息後都已經即刻約埋幾個朋友，今個周末放假一齊捐血。

香港紅十字會輸血中心血液收集及招募部主管梁雅詩話，最近成日落大雨影響市民外出意欲，加上好多市民感染新冠、流感而捐唔到血，導致整體血液收集量大減。佢又話血庫目標每日收集650袋血液，但近日最差只收到400袋。輸血服務中心呼籲16至65歲嘅合資格人士盡快捐血，又提醒想去捐血嘅朋友先打電話、上網，或者用手機應用程式預約，咁就唔使喺捐血站排隊等咁耐。

輸血中心另外喺facebook提供「捐血愛心錦囊」，提醒大家流感或感冒康復一個禮拜後就可以捐血，如果有發燒或者感染新冠就要休息兩個禮拜；打完流感、新冠針一日後亦都可以捐血，但如果紋眉、紋身等就要等6個月喇！