【Emily】上任滿月 徐英偉細數酒店聯會工作

【明報專訊】前民政事務局長徐英偉（Caspar）做咗酒店業主聯會執行總幹事一個月，近期轉趨活躍。佢喺社交網站LinkedIn發表工作報告，細數一個月做咗啲咩，例如同政府政策局同部門開咗12個會，接受咗14個電子同印刷傳媒訪問，同12個立法會議員有接觸，又同業界、政府組織開咗8次會，表達酒店業界對勞工短缺、五一黃金周等議題嘅睇法。

Caspar話隨住社交距離措施取消，香港又恢復同內地通關，酒店業界必須面對行內嘅挑戰。佢話喺同聯會會員見面時，大家始終最關注人手短缺，其他仲包括酒店價格同其他法例要與時並進等。

佢又特登多謝兩個得力助手，一個係聯會經理，一個係助理，咁啱兩個英文名都叫Winnie，Caspar稱呼佢哋做「雙win」。