【Emily】皇仁160歲設基金 徐沛之獻墨寶籌款

【明報專訊】因新冠疫情押後咗嘅皇仁書院（QC）160周年晚宴，上周六喺嘉里酒店舉行，筵開80幾席，跨世代「QC仔」濟濟一堂，好不熱鬧，好多前高官QC仔都有捧場，包括黃仁龍、周一嶽、楊德強等。

QC本身係官校，唔似其他教會學校同直資學校，有深厚嘅籌款文化，過去都係倚賴霍英東同何鴻燊兩位大老踴躍捐輸，如今兩老都已經離開咗，籌款工作無過往咁容易，舊生會決定成立慈善基金，希望將籌款工作制度化、恒常化。而呢個慈善基金會由一班德高望重嘅皇仁師兄做信託人，確保所有善款都用嚟照顧學校以及同學嘅需要。

為咗要幫慈善基金起動，舊生會搵嚟藝術家校友徐沛之，以校訓「勤有功」創作160幅不同風格嘅書法作品來義賣。徐沛之嘅墨寶曾經喺明報〈星期日副刊〉亮相過，佢近年嘅國畫同書法作品喺藝術市場相當受讚賞，多幅國畫作品曾於佳士得拍賣會以6位數字拍出。幫忙搞義賣嘅皇仁舊生羅永聰就話，知道係徐沛之嘅書法作品，唔少舊生都話「抵買」，加上係慈善捐款，已有好幾位善長表達願意捐出10萬元支持基金會，仲話有信心義賣會有唔錯嘅成績。