【Emily】管浩鳴伙狄志遠組社福心連心 內地多官將赴成立典禮

【明報專訊】選委會界別立法會議員管浩鳴牽頭成立社福團體「香港社福界心連心大行動」，下禮拜一（29日）會喺灣仔會展搞成立典禮。Emily留意到下周活動流程，除咗同勞福局、社署合辦「社福開新篇」高峰會，仲有多個香港官員、內地官員同內地機構加持，特首李家超、國家民政部領導、中聯辦領導會擔任主禮嘉賓，勞福局長孫玉菡、社署署長李佩詩、中國社會工作聯合會會長陳存根、國家鄉村振興局中國扶貧發展中心主任黃承偉、衛健委老齡健康司長王海東都會喺唔同環節發言。

狄任副主席 話唔會取代社聯

管牧噚日同傳媒茶敘時，勞福局前常任秘書長譚贛蘭就以成立典禮籌委會主席身分現身。Emily留意到，原來譚贛蘭擔任大行動3個副主席其中一個，社福界立法會議員狄志遠都會做副主席。曾經參選立法會社福界嘅民建聯朱麗玲就會擔任秘書長。

狄志遠接受查詢時證實消息，話由於同管牧疫情期間喺基層活動有合作開，所以就加入。至於大行動會唔會同社聯競爭，狄志遠話社聯統籌唔同社福機構，同社福機構聯手提供先導計劃，而大行動主要係一個動員同合作平台，思考社福界定位，職能可能同社聯點都有重複，但唔會取代社聯。