【Emily】夏寶龍抵澳 促推進國安配套立法

【明報專訊】上月嚟香港考察嘅港澳辦主任夏寶龍噚日抵達澳門，開始一連四日嘅考察，行程本身無對外公開，港澳辦噚晚透露佢去咗橫琴粵澳合作區調研，澳門傳媒就報道佢去咗澳門禮賓府出席晚宴。澳門政府噚晚約11點出稿，透露夏寶龍同澳門行政、立法、司法機關主要負責人座談時提及，維護國家主權安全係一國兩制最高原則，「只有進行時，沒有完成時」，呼籲行政、立法、司法機關要全面準確實施澳門新修訂嘅《國安法》，同埋「加快推進相關配套立法工作」。

夏寶龍重申要堅持底線思維，增強憂患意識，防範化解各類風險隱患，同埋「旗幟鮮明地同破壞澳門繁榮穩定的任何勢力作堅決鬥爭」。

夏寶龍又讚澳門近期推進一國兩制「取得了許多突破性進展，很有成效」，包括近期通過新嘅國安法、批出新一輪博彩經營權、穩住疫情後對經濟嘅衝擊等。佢重申中央長期堅持一國兩制，確保一國兩制不會變、不動搖嘅立場一以貫之，呼籲澳門居民堅守「一國」底線，維護憲法同基本法憲制秩序。